David Tinikashvili

დავით თინიკაშვილი

დავით თინიკაშვილი – ოქსფორდის უნივერსიტეტის ქვეყანათმცოდნეობის ინტერდისციპლინარული კვლევების სკოლის “საქართველოს შემსწავლელი მეცნიერებების” პროგრამის პოსდოქტორანტი მკვლევარი (2020-2021 აკადემიური წელი) პროექტით: “მნიშვნელოვანი ქართული ტრაქტატი (მე-18ს.) დასავლური ქრისტიანობის შესახებ ქართულ-ევროპული ურთიერთობების კონტექსტში”. 2018 წელს სამი თვით იმყოფებოდა ფილოსოფიურ-თეოლოგიურ კათოლიკურ კოლეჯში (მაინის ფრანკფურტი, გერმანია). 2016-2017 წლებში ექვსი თვის მანძილზე პოსტსადოქტორო პროგრამის ფარგლებში მუშაობდა ტალინის უნივერსიტეტში (ესტონეთი); 2012-2015 წლებში ილიას სახელმწიფო უნივერსიტეტის სადოქტორო პროგრამის ბოლო, დისერტაციის დასრულების წელი მუშაობდა გენტის უნივერსიტეტში (ბელგია 2014-2015). დისერტაციის თემა: „ქართველებისა და დასავლეთ ევროპელთა რელიგიურ-პოლიტიკური ურთიერთობა მე-11-13 საუკუნეებში“ (მიენიჭა ისტორიის დოქტორის ხარისხი). 2014 წელს დოქტორანტის სტატუსით ერთი თვით იმყოფებოდა ფრიბურგის უნივერსიტეტში (შვეიცარია). 2009-2011 წლებში სწავლობდა ილიას სახელმწიფო უნივერსიტეტის სამაგისტრო პროგრამაზე “ქრისტიანული თეოლოგია” (მიენიჭა თეოლოგიის მაგისტრის ხარისხი). 1997-2003 წლებში სწავლობდა საქართველოს მართლმადიდებელი ეკლესიის სასულიერო სემინარიაში.

საქართველოში მიწვეული ლექტორის სტატუსით რამდენიმე სალექციო კურსს უძღვება ისტორიის, რელიგიის კვლევებისა და თეოლოგიის მიმართულებით ილიას სახელმწიფო უნივერსიტეტში (2010 წლიდან), გრიგოლ რობაქიძის უნივერსიტეტში (2016 წლიდან) და კავკასიის უნივერსიტეტში (2019 წლიდან). წარსულში ასევე ასწავლიდა რომის კათოლიკური ეკლესიის მიერ დაფუძნებულ სულხან-საბა ორბელიანის უნივერსიტეტში (2007-2008წწ.). 2017 წლიდან ილიას სახელმწიფო უნივერსიტეტის აღმოსავლეთმცოდნეობის ინსტიტუტის ასოცირებული მკვლევარია.

მისი ბოლო უცხოენოვანი რეცენზირებული სტატიაა: Tinikashvili, David. “The Orthodox Church of Georgia and the Ecumenical Movement (before and after 1997)”, Journal of Eastern Christian Studies 71:1-2, 2019, pp. 127-159. აღნიშნული სტატია გავრცობილი ვერსიაა მოხსენებისა, რომელიც წაკითხულ იქნა 2017 წლის 15 სექტემბერს რედბოუდის უნივერსიტეტში (ნაიმეგენი, ნიდერლანდები) გამართული სემინარზე.

2009-2010 წლებში (ზურაბ ჯაშთან თანავტორობით) მშვიდობის, დემოკრატიისა და განვითარების კავკასიურ ინსტიტუტში (CIPDD) ერთი წლის მანძილზე მუშაობდა სახელმძღვანელოზე „მსოფლიო რელიგიები“, რომელიც 2012 წელს ილიას სახელმწიფო უნივერსიტეტის მიერ გამოიცა.

აკადემიური საქმიანობის გარდა თავისი წვლილი შეიტანა საქართველოში რელიგიის თავისუფლების დაცვისა და რელიგიური უმცირესობების საქმიანობის ობიექტური გაშუქების თვალსაზრისით, ასევე ქართულ საზოგადოებაში აქტუალურ რელიგიურ თემებზე საგანმანათლებლო სტატიების გამოქვეყნების მიმართულებით. პუბლიკაციები იხ.: 2006-2010 წლებში სახალხო დამცველის ოფისის ჟურნალში „სოლიდარობა“ (11 სტატია) და 2012 წელს ჟურნალ “ლიბერალის” ვებ-გვერდზე (22 სტატია); ასევე 2011-2013 წლებში განათლებისა და მეცნიერების სამინისტროს მასწავლებელთა პროფესიული განვითარების ცენტრის ჟურნალ „მასწავლებლის“ ვებ-გვერდისთვის (mastsavlebeli.ge) მოამზადა 25-მდე სტატია სასკოლო განათლების საკითხებზე.

2013 წელს სამოქალაქო ინტეგრაციისა და ეროვნებათშორისი ურთიერთობების ცენტრის პროექტის (ინტერკულტურული განათლების კვლევა სკოლებში) ფარგლებში განახორციელა 17 სასკოლო სახელმძღვანელოს პროფესიული ანალიზი რელიგიური მრავალფეროვნების თვალსაზრისით. კვლევის შედეგი იხ. პუბლიკაციაში: Shalva Tabatadze, Natia Gorgadze, Kakha Gabunia, David Tinikashvili. “Intercultural Content and Perspectives in School Textbooks in Georgia”, Intercultural Education 31:4 (July-August), 2020. (იბეჭდება).

Print Friendly

Comments are closed.